ಶ್ರೀ ಅನಂತ ಕುಮಾರ್

 ಹೆಗ್ಗನಹಳ್ಳಿ ನಾರಾಯಣಶಾಸ್ತ್ರಿ ಅನಂತ ಕುಮಾರ್ (22 ಜುಲೈ 1959 ರಿಂದ 12, ನವೆಂಬರ್ 2018) ಭಾರತೀಯ ಜನತಾ ಪಾರ್ಟಿ(ಬಿಜೆಪಿ)ಯಲ್ಲಿ ಸಕ್ರಿಯವಾಗಿದ್ದ ಭಾರತೀಯ ರಾಜಕಾರಣಿ. ಅವರು 2014 ರಿಂದ 2018 ರಲ್ಲಿ ನಿಧನರಾಗುವವರೆಗೆ ಭಾರತದ ಸಂಸದೀಯ ವ್ಯವಹಾರಗಳ ಹಾಗೂ ರಾಸಾಯನಿಕ ಮತ್ತು ರಸಗೊಬ್ಬರಗಳ ಸಚಿವರಾಗಿದ್ದರು.

ಅನಂತ ಕುಮಾರ್ ರವರು ಬೆಂಗಳೂರು ದಕ್ಷಿಣದಿಂದ 6 ಬಾರಿ ಸಂಸದರಾಗಿದ್ದರು.  26 ಮೇ 2014 ರಿಂದ ರಾಸಾಯನಿಕ ಮತ್ತು ರಸಗೊಬ್ಬರಗಳ ಖಾತೆಯ ಸಚಿವರಾಗಿದ್ದರು. 2016 ರಿಂದ ಸಂಸದೀಯ ವ್ಯವಹಾರಗಳ ಸಚಿವರಾಗಿದ್ದರು. ಎರಡು ದಶಕಗಳ ಕಾಲ ಲೋಕಸಭಾ ಸದಸ್ಯರಾಗಿದ್ದರು, 1996 ರಿಂದ ಅವರ ಮರಣದವರೆಗೆ ಬೆಂಗಳೂರು ದಕ್ಷಿಣ ಲೋಕಸಭಾ ಕ್ಷೇತ್ರವನ್ನು ಪ್ರತಿನಿಧಿಸುತ್ತಿದ್ದರು. ನಾಗರಿಕ ವಿಮಾನಯಾನ ಖಾತೆ, ಪ್ರವಾಸೋದ್ಯಮ, ಕ್ರೀಡೆ, ನಗರಾಭಿವೃದ್ಧಿ ಮತ್ತು ಬಡತನ ನಿರ್ಮೂಲನೆ ಸಚಿವರಾಗಿಯೂ ಸೇವೆ ಸಲ್ಲಿಸಿದ್ದಾರೆ.

     ಶ್ರೀ ಅನಂತ ಕುಮಾರ್‌ ಅಖಿಲ ಭಾರತೀಯ ವಿದ್ಯಾರ್ಥಿಪರಿಷತ್ (ಎಬಿವಿಪಿ) ಕಾರ್ಯಕರ್ತರಾಗಿದ್ದರು. ನಂತರ ಎಬಿವಿಪಿಯ ರಾಜ್ಯ ಕಾರ್ಯದರ್ಶಿಯಾಗಿ ಜವಾಬ್ದಾರಿಯನ್ನು ನಿರ್ವಹಿಸಿದರು. 1985 ರಲ್ಲಿ ಎಬಿವಿಪಿಯ ರಾಷ್ಟ್ರೀಯ ಪ್ರಧಾನ ಕಾರ್ಯದರ್ಶಿಯಾದರು. 1987 ರಲ್ಲಿ ಬಿಜೆಪಿ ಸೇರಿ, ಭಾರತೀಯ ಜನತಾ ಯುವಮೋರ್ಚಾದ ರಾಜ್ಯಾಧ್ಯಕ್ಷರಾಗಿ ಆಯ್ಕೆಯಾದರು.

ನಂತರ ಅವರನ್ನು 1996 ರಲ್ಲಿ ಪಕ್ಷದ ರಾಷ್ಟ್ರೀಯ ಕಾರ್ಯದರ್ಶಿಯಾಗಿ ಆಯ್ಕೆ ಮಾಡಲಾಯಿತು.  1996 ರಲ್ಲಿ ಅವರು ಬೆಂಗಳೂರು ದಕ್ಷಿಣ ಲೋಕಸಭಾ ಕ್ಷೇತ್ರದಿಂದ 11 ನೇ ಲೋಕಸಭೆಗೆ ಆಯ್ಕೆಯಾದರು. ಮತ್ತು ಎರಡನೇ ವಾಜಪೇಯಿ ಮಂತ್ರಿಮಂಡಲಕ್ಕೆ ಸೇರ್ಪಡೆಗೊಂಡರು. 1999 ರಲ್ಲಿ, ಅವರು ಸತತ ಮೂರನೇ ಅವಧಿಗೆ ಮರು ಆಯ್ಕೆಯಾದರು ಮತ್ತು ಎನ್.ಡಿಎ ಸರ್ಕಾರದಲ್ಲಿ ಕ್ಯಾಬಿನೆಟ್ ಮಂತ್ರಿಯಾದರು. ಪ್ರವಾಸೋದ್ಯಮ, ಕ್ರೀಡೆ ಮತ್ತು ಯುವ ವ್ಯವಹಾರಗಳು, ಸಂಸ್ಕೃತಿ, ನಗರಾಭಿವೃದ್ಧಿ ಮತ್ತು ಬಡತನ ನಿರ್ಮೂಲನೆಯಂತಹ ವಿವಿಧ ಖಾತೆಗಳನ್ನು ನಿರ್ವಹಿಸಿದ್ದಾರೆ.

ಅವರು 2003 ರಲ್ಲಿ ಬಿಜೆಪಿಯ ಕರ್ನಾಟಕ ರಾಜ್ಯ ಘಟಕದ ಅಧ್ಯಕ್ಷರಾದರು. ಇವರ ಅಧ್ಯಕ್ಷಾವಧಿಯಲ್ಲಿ ವಿಧಾನಸಭೆಯಲ್ಲಿ ಏಕೈಕ ದೊಡ್ಡ ಪಕ್ಷವಾಯಿತು ಮತ್ತು ಕರ್ನಾಟಕದಲ್ಲಿ 2004 ರಲ್ಲಿ ಬಹುಪಾಲು ಲೋಕಸಭಾ ಸ್ಥಾನಗಳನ್ನುಗೆದ್ದಿತು. 2004ರಲ್ಲಿ ಬಿಜೆಪಿಯ ರಾಷ್ಟ್ರೀಯ ಪ್ರಧಾನ ಕಾರ್ಯದರ್ಶಿಯಾಗಿ ನೇಮಕಗೊಂಡರು.

ಅನಂತಕುಮಾರ್ ರಾಸಾಯನಿಕ ಮತ್ತು ರಸಗೊಬ್ಬರ ಸಚಿವರಾಗಿದ್ದಾಗ, ಹೃದ್ರೋಗಿಗಳಿಗೆ ಸರಾಸರಿ ಒಂದು ಲಕ್ಷದಷ್ಟು ಲಾಭವನ್ನು ನೀಡುವ ಪರಿಧಮನಿಯ ಸ್ಟಂಟ್‌ಗಳ ಬೆಲೆಯನ್ನು ಕಡಿಮೆ ಮಾಡಲು ಶ್ರಮಿಸಿದರು. ರಾಸಾಯನಿಕಗಳು ಮತ್ತು ರಸಗೊಬ್ಬರ ಖಾತೆ ಸಚಿವರಾಗಿ, 100% ಕಡ್ಡಾಯವಾಗಿ ಬೇವಿನ ಲೇಪಿತ ಯೂರಿಯಾವನ್ನು ಜಾರಿಗೆ ತಂದರು, ಇದರಿಂದ ಯೂರಿಯಾವನ್ನು ಕೈಗಾರಿಕಾ ವಲಯದಲ್ಲಿ ಕಾಳಸಂತೆಯಲ್ಲಿ ಮಾರಾಟ ಮಾಡುವುದು ನಿಂತು ಹೋಯಿತು.

ಜನ ಔಷಧಿ ಅಂಗಡಿಗಳನ್ನು ತೆರೆಯುವ ವ್ಯವಸ್ಥೆಯನ್ನು ತೆರೆಯುವ ಅನಂತಕುಮಾರ್ ರವರ ಯೋಜನೆಯಿಂದ ಮೊಣಕಾಲು ಇಂಪ್ಲಾಂಟ್‌ಗಳ ಬೆಲೆ 69% ರಷ್ಟು ಕಡಿತವಾಯಿತು. ಅವರ ಮಾರ್ಗದರ್ಶನದಲ್ಲಿ, ಮೇ 2014 ರಲ್ಲಿ ಭಾರತದಾದ್ಯಂತ (ನವೆಂಬರ್ 1, 2018ರಿಂದ) ಜನ ಔಷಧಿ ಕೇಂದ್ರಗಳ ಸಂಖ್ಯೆ 89 ರಿಂದ 4300ಕ್ಕೆ ಏರಿತು. ಅನಂತಕುಮಾರ್ ಅಂತರಾಷ್ಟ್ರೀಯ ಮಹಿಳಾ ದಿನಾಚರಣೆಯ ಸಂದರ್ಭದಲ್ಲಿ (8 ಮಾರ್ಚ್ 2018) ಸುವಿಧಾ ಜೈವಿಕ ವಿಘಟನೀಯ ಮತ್ತು ಪರಿಸರಸ್ನೇಹಿ(5 ಜೂನ್ 2018 ರಿಂದ) ಸ್ಯಾನಿಟರಿಪ್ಯಾಡ್‌ಗಳನ್ನು ಕೇವಲ ₹  2.50 ಕ್ಕೆ ಬಿಡುಗಡೆ ಮಾಡಿದರು.

ಕಲ್ಲಿದ್ದಲು ಮತ್ತು ತೈಲ ಮತ್ತು ನೈಸರ್ಗಿಕ ಅನಿಲ ಸಚಿವಾಲಯದೊಂದಿಗೆ 48,000 ಕೋಟಿ ಹೂಡಿಕೆಯೊಂದಿಗೆ  6 ಮುಚ್ಚಿದ್ದ ರಸಗೊಬ್ಬರ ಘಟಕಗಳನ್ನು ಪುನರ್ಜೀವನಗೊಳಿಸುವ ಉಪಕ್ರಮಗಳನ್ನು ಅವರು ಪ್ರಾರಂಭಿಸಿದರು. ಬೆಂಗಳೂರಿನಲ್ಲಿ ಅಂತಾರಾಷ್ಟ್ರೀಯ ವಿಮಾನ ನಿಲ್ದಾಣದ ಒಪ್ಪಂದಕ್ಕೆ ಸಹಿ ಹಾಕಿದರು ಮತ್ತು ವಾಜಪೇಯಿ ಸರ್ಕಾರದಲ್ಲಿ ನಾಗರಿಕ ವಿಮಾನಯಾನ ಸಚಿವರಾಗಿದ್ದಾಗ ಎಚ್‌ಎಎಲ್ (HAL) ವಿಮಾನ ನಿಲ್ದಾಣದಲ್ಲಿನ ಸೌಲಭ್ಯಗಳನ್ನು ಸುಧಾರಿಸಲು ಕ್ರಮ ಕೈಗೊಂಡರು.

     ನೂತನ ಸಾರಿಗೆ ನೀತಿಯನ್ನು ರೂಪಿಸಿದ, ಬೆಂಗಳೂರು ಮೆಟ್ರೋ ಯೋಜನೆಗೆ ವಾಜಪೇಯಿ ಸಂಪುಟದ ಅನುಮೋದನೆಗಾಗಿ ಶ್ರಮಿಸಿದ ಕೀರ್ತಿಯೂ ಅನಂತ ಕುಮಾರ್ ರವರಿಗೆ ಸಲ್ಲುತ್ತದೆ. ಅವರು ತಮ್ಮ ಸ್ವಕ್ಷೇತ್ರಕ್ಕೆ ಸೇವೆ ಸಲ್ಲಿಸಲು ತಮ್ಮದೇ ಆದ ವೆಬ್‌ಸೈಟ್ಅನ್ನು ಪ್ರಾರಂಭಿಸಿದ ಮೊದಲ ಭಾರತೀಯ ಸಂಸದರು ಎಂಬ ಕೀರ್ತಿಗೆ ಪಾತ್ರರಾಗಿದ್ದಾರೆ.